На сите клиенти кои се занимаваат со увоз или извоз на стоки UNIQA Осигурување им нуди квалитетно осигурително покритие на стоките во транспорт - Карго осигурување.

Секоја пратка на стоки во транспорт се пријавува со посебна пријава по факс, e-mail, пошта или со лична достава. Фактурната вредност на пратката ја претставува сумата на осигурување која може да се зголеми за износот на трошоците и/или добивката, но најмногу до 30%, со што така зголемената вредност на стоката претставува максимална обврска на UNIQA Осигурување во случај да настапи осигуран ризик.

Осигурителното покритие на пратките кои патуваат на ризик на осигуреникот, од местото на товар до местото на растовар (врата-до-врата) во копнен превоз е по клаузулата *А* (ALL Risks - против сите ризици). Осигурувањето по оваа клаузула ги покрива *сите ризици*, загуба или оштетување на осигурената пратка кои се настанати како непосредна последица на сообраќајна незгода, елементарни непогоди, пожар, поплава, делумна кражба, кражба на целото возило, разбојништво, штети настанати при натовар или растовар на стоката. Ова осигурување во никој случај не ги покрива штетите настанати при неправилен натовар и растовар, несоодветно пакување на стоката, заради природните својства на стоката, оштетувања кои веќе постоеле пред приемот на стоката за превоз, употреба на несоодветно возило или контејнер,прекинување на превозот по наредба на осигуреникот, војна, побуни, граѓанска војна, немири или било какви наредби на власта и штети кои настануваат заради зла намера или голема небрежност на осигуреникот, за кои тој одговара (испраќачот, натоварувачот или примателот).

Осигурувањето започнува во моментот кога стоката се превзема од складот со цел за непосреден натовар, а престанува во моментот кога ќе се истовари од превозното средство во местото на истовар назначено во полисата за осигурување, најкасно 24 часа, сметано од моментот на пристигнувањето во определеното место.

Предмет на осигурување кај домашниот транспорт се сите пратки на стоки кои се превезуваат со туѓи или сопствени превозни средства на ризик на осигуреникот на територија на Република Македонија. UNIQA Осигурување се обврзува на осигуреникот да му надомести физички губиток или оштетување на осигурената стока заради:

• сообраќајна незгода на превозното средство;
• пожар или експлозија од вонредни надворешни причини;
• елементарна непогода;
• покиснување;
• кражба (делумна или тотална);
• оштетување на осигурените пратки - стоки за време на транспорт, натовар, истовар и претовар;
• оштетување на амбалажата (кинење на вреќи, кршење на амбалажата со истурање или истечување на содржината).

Премијата за осигурување се пресметува врз основа на збирот на сите влезни фактури и реализацијата, доколку не се договори поинаку.

Со ова осигурување осигуреникот ја осигурува својата одговорност како превозник спрема корисниците на превозот за докажана целосна или делумна загуба, оштетување или задоцнување на пратките во домашен и меѓународен превоз, преземени на превоз со товарен лист или соодветен документ.

UNIQA Осигурување ќе му ги надомести на осигуреникот сите износи кои тој треба да ги плати врз основа на одговорноста до максималната лимитирана обврска утврдена во полисата за осигурување. Премијата за осигурување зависи од висината на осигурителното покритие и се утврдува со полисата за осигурување.

Осигуреникот е должен да му достави на осигурувачот пријава за настанатата штета веднаш или најдоцна 3 дена од нејзиното настанување т.е. дознавање. Кога ќе настане штета осигуреникот е должен веднаш да ја констатира записнички ако по негова процена не го минува износот од 500 EUR, а ако таа го надминува тој износ обврзан е веднаш да го извести осигурувачот. Ако превозот или преносот се врши со превозни средства кои не се на осигуреникот, штетата да се констатира во присуство на превозникот според условите по договорот за превоз и тоа:

1. Кај превоз со железница, железнички записник за увид, а ако оштетувањето не е видливо при превземање на пратката - куќен записник, кој го испоставува железницата во рок од 7 дена од денот на превземањето на пратката.
2. Кај превоз со камион, записник составен од преставници на осигуреникот и превозникот - записник потпишан од возачот на камионот.
3. Штетата може да се констатира по наод на судски вештак или по судски пат (или со наод на хаварискиот комесар на осигурувачот). Оштетното побарување по основ на осигурувањето се поднесува писмено. Кон барањето се приложува: полиса за осигурување, оригинален превозен документ, записник за утврдување на штетата, фактура за осигурената стока или друг доказ за вредноста на стоката и други докази за платени споредни трошоци во врска со стоката, како и други докази за причината и висината на настанатата штета. Со поднесувањето на оштетното барање, осигуреникот му доставува на друштвото за осигурување и документ за пренос на своите права кои ги има према лицата одговорни за штетата (цесија).